ယနေ့ကျရောက်သော လူထုခေါင်းဆောင် ဒေါ်အောင်ဆန်းစုကြည်၏ မွေးနေ့အခါသမယတွင် ဒေါ်အောင်ဆန်းစုကြည် ကိုယ်စိတ်နှစ်ဖြာ ကျန်းမာချမ်းသာပါစေကြောင်း၊ အနှောင်အဖွဲ့ အတားအဆီး အချုပ် အနှောင်များမှ အမြန်ဆုံးလွတ်မြောက် ပါစေကြောင်းနှင့်ပြည်သူလူထုကို ဆက်လက် ဦးဆောင်ပြီး သူမနှင့်တကွ ပြည်သူများ လိုလားတောင့်တသည့် ဒီမိုကရေစီပြည်ထောင်စုစနစ်ကြီးကို အလျင် အမြန်တည်ဆောက်နိုင်ပါစေ ကြောင်း ဆုမွန်ကောင်းတောင်းအပ်ပါသည်။
ဒေါ်အောင်ဆန်းစုကြည်၏ ဖခင်ဗိုလ်ချုပ်အောင်ဆန်းနှင့်တကွ အမြော်အမြင်ကြီးကြသော တိုင်းရင်းသား ခေါင်းဆောင်ကြီးများသည် လွတ်လပ်ရေးကို တစည်းတလုံးတည်း ရယူရန်နှင့် တိုင်းရင်းသားတိုင်းတန်းတူရေးနှင့် ကိုယ်ပိုင်ပြဌာန်းခွင့်တို့ကို အာမခံသည့် ပြည်ထောင်စုကြီးကို တည်ဆောက်မည့် ပင်လုံစာချုပ်ကြီးကို ချုပ်ဆိုခဲ့ပြီး လွတ်လပ်ရေးကို အရယူနိုင်ခဲ့ပါသည်။
သို့သော် ခေါင်းဆောင်ကြီးများလုပ်ကြံခံရပြီးနောက် ပင်လုံစာချုပ်ပါ အနှစ်သာရများကို အာဏာပိုင်များမှ ပစ်ပယ်ခဲ့မှု အပေါ်မူတည်၍ ပေါ်ပေါက်လာသော မကျေလည်မှုများအပါအဝင် နိုင်ငံရေးပြဿနာများကို နိုင်ငံရေးအရ မဖြေရှင်းဘဲ အကြမ်းဖက်စစ်တပ်အားကိုးဖြေရှင်းမှုများကြောင့် နောက်ဆုံးတွင် စစ်တပ်မှ အာဏာသိမ်းကာ တတိုင်းပြည်လုံး စစ်ကျွန်ဘဝသို့ ရောက်ရှိခဲ့သည်မှာ ယနေ့တိုင်ဖြစ်ပါသည်။
အမျိုးသားတန်းတူရေးနှင့် ဒီမိုကရေစီရေးတို့အတွက် မရေတွက်နိုင်သော နိုင်ငံသားကောင်းများနှင့် မိသားစုများ ကြေပြုန်းခဲ့ရပါသည်။ ဒေါ်အောင်ဆန်းစုကြည်အပါအဝင် ပြည်သူများအားလုံးသည် မိမိတို့၏ လူ့အခွင့်အရေး များနှင့် မျှော်မှန်းချက်များ ဆုံးရှုံးနေခဲ့ရပါသည်။
အာဏာရှင်စံနစ်ပယ်ရှားသုတ်သင်ရေးနှင့် ဒီမိုကရေစီပြည်ထောင်စုပြည်ထောင်စုကြီးတည်ဆောက်ရေး အမျိုးသားကြိုးပမ်းမှုကြီးတွင် ဒေါ်အောင်ဆန်းစုကြည်သည် ၁၉၈၈ခုနှစ်မှစ၍ ပြည်သူကို တောက်လျှောက် ဦးဆောင်ကာ မဆုတ်မနစ် ကြိုးပမ်းအားထုတ်ခဲ့ပါသည်။ ၎င်းဦးဆောင်မှုသည် မြန်မာပြည်သူအများအတွက် မီးရှုးမီးတိုင်၊ အားကိုးရာ၊ အားထားရာဖြစ်ပါသည်။
သို့ဖြစ်ပါ၍ ယနေ့မွေးနေ့သာမယတွင် ဒေါ်အောင်ဆန်းစုကြည်နှင့် ပြည်သူတရပ်လုံးသည် မိမိတို့နှင့် ထိုက်တန်လှသော ဒီမိုကရေစီနှင့် လူ့အခွင့်အရေး၊ တန်းတူရေးနှင့် ကိုယ်ပိုင်ပြဌာန်းခွင့် ပြည့်ဝသော ပြည်ထောင်စုစနစ်ကြီးကို ရရှိခံစားနိုင်ပါစေကြောင်း ဆုမွန်ကောင်းတောင်းအပ်ပါသည်။
