New Myanmar Foundation ၏ ၂၅-၅-၂၀၂၄ မှ ၂၂-၆-၂၀၂၄ ရက်နေ့အထိ (၁) လကြာ ကျင်းပဖွင့်လှစ်သည့် အခမဲ့ အခြေခံလျှပ်စစ်မော်တာစက်ချုပ်ပညာရပ်သင်တန်း အပတ်စဉ်-(၂) သင်တန်းဆင်းပွဲ ကို (၂၂-၆-၂၀၂၄) ရက်နေ့ မနက် (၁၀) နာရီတွင် ထိုင်း-မြန်မာနယ်စပ်ဒေသရှိ Sewing Machine Training Center တွင် ကျင်းပ ပြုလုပ်ခဲ့ပါသည်။
သင်တန်း အပတ်စဉ် (၂) ကို အောင်မြင်ပြီးမြောက်သည်အထိ တက်ရောက်ခဲ့ကြသော သင်တန်းသူ၊ သင်တန်းသား (၁၆) ဦး ရှိပါသည်။
သင်တန်းဆင်းပွဲတွင် ဦးစွာပထမ New Myanmar Foundation ၏ Executive Director Dr. Sann Aung မှ Zoom Application (Online) မှ တစ်ဆင့် သင်တန်းကာလတစ်လျှောက် အကောင်းဆုံးသင်ကြားပေးခဲ့သော သင်တန်းဆရာမ (၂) ဦး နှင့်တကွ သင်တန်းအဆုံးထိ တစိုက်မတ်မတ် ကြိုးစားသင်ယူခဲ့ကြသော သင်တန်းသား၊ သင်တန်းသူများကို ချီးကျူးဂုဏ်ပြုပါကြောင်း၊ သင်တန်းပြီးဆုံးသွားသော်လည်း သင်တန်းဆရာမများနှင့်ဖြစ်စေ၊ သင်တန်းသားအချင်းချင်းဖြစ်စေ အဆက်အသွယ်မပြတ်စေပဲ အကူအညီလိုအပ်ပါက တစ်ဦးနှင့်တစ်ဦး အပြန်အလှန် ကူညီပေးနိုင်အောင် ကြိုးစားကြစေလိုကြောင်း၊ ယခုစက်ချုပ်သင်တန်းသည် ပညာရပ်တစ်ခုအနေဖြင့်သာမက ချိတ်ဆက်နိုင်သော Network များကိုပါ ချိတ်ဆက် ပြုလုပ်ပေးနိုင်သည့်အတွက် သင်တန်းပြီးဆုံးသွားသော်လည်း အခက်အခဲ တစ်စုံတစ်ရာရှိပါက New Myanmar Foundation မှ ကူညီပေးရန် အသင့်ရှိနေကြောင်း၊ အလုပ်အကိုင်အခွင့်အလမ်းများအတွက်လည်း ကြိုးစားရှာဖွေပေးသွားမည်ဖြစ်ကြောင်း၊ သင်တန်းသူများအနေဖြင့် မိမိတို့ရောက်ရှိနေသည့်နေရာတွင် မိမိခြေထောက်ပေါ်မိမိရပ်တည်နိုင်ရန် ကြိုးစားသင့်ကြောင်း၊ မိမိတို့အနေဖြင့်လည်းအကောင်းဆုံး ကူညီပံ့ပိုးပေးသွားမည်ဖြစ်ကြောင်း ပြောကြားခဲ့ပါသည်။
ထို့နောက် နယူးမြန်မာဖောင်ဒေးရှင်း၏ ဆရာသန်းမြင့်အောင်မှ နယူးမြန်မာဖောင်ဒေးရှင်း စက်ချုပ်သင်တန်းတွင် သင်တန်းအဆုံးထိ ကြိုးစားတက်ရောက်ကာ အသက်မွေးဝမ်းကျောင်းပညာတစ်ခုကို တတ်မြောက်ကျွမ်းကျင်အောင် သင်ယူခဲ့ကြသော သင်တန်းသူများအတွက် ဂုဏ်ယူပါကြောင်း၊ မိမိအနေဖြင့် သင်တန်းသားများအတွက် အလုပ်အကိုင်အခွင့်အလမ်းများ ရှာဖွေပေးနိုင်ရန် အကောင်းဆုံးကြိုးစားပေးမည် ဖြစ်ကြောင်း၊ သင်တန်းသားများအနေဖြင့်လည်း ယခုသင်တန်းမှ ပို့ချပေးသည့် စက်ချုပ်ပညာရပ်များကို ကျွမ်းကျင်ရုံ မျှဖြင့် ရပ်တန့်မနေကြပဲ လိုအပ်သည်များကို ထပ်မံလေ့လာဆည်းပူးကြစေလိုကြောင်း၊ စက်ရုံအလုပ်ရုံများတွင် ကြုံတွေ့နိုင်သော အခက်အခဲများနှင့် အလုပ်အကိုင်အခွင့်အလမ်းရှာဖွေရန် အခြေအနေများအား အကျဉ်းချုပ် ရှင်းပြသွားခဲ့ပါသည်။ ဆက်လက်၍ ရှာဖွေပေးခဲ့သော အလုပ်တွင် လုပ်ကိုင်နေစဉ်အတွင်း မကျေနပ်ချက်များနှင့် တိုင်တန်းရန် လိုအပ်ပါက မိမိအနေဖြင့် ကူညီပံ့ပိုးပေးသွားမည်ဖြစ်ကြောင်း၊ ရှာဖွေပေးသောစက်ရုံတွင် အဆင်မပြေမှုများရှိခဲ့ပါက မိမိထံလာရောက်ဆွေးနွေးတိုင်ပင်နိုင်ကြောင်း၊ သင်တန်းသားအချင်းချင်းလည်း အလုပ်အကိုင်အခွင့်အလမ်းများနှင့်ပတ်သတ်၍ မျှဝေပေးစေလိုပါကြောင်း၊ သင်တန်းမှ စီစဉ်ပြုလုပ်ပေးထားသော သတင်းအချက်အလက်မျှဝေသည့် Channel တွင်လည်း အလုပ်အကိုင်နှင့်ပတ်သတ်သော အကြောင်းအရာများ မျှဝေပေးသွားမည်ဖြစ်ကြောင်း ပြောကြားခဲ့ပါသည်။
ဆက်လက်၍ သင်တန်း တာဝန်ခံ မသိင်္ဂီမှ အခမဲ့ အခြေခံ မော်တာစက်ချုပ်သင်တန်း အပတ်စဉ် (၂) အား သင်တန်းအစမှ ပြီးဆုံးသည်အထိ ကြိုးကြိုးစားစား အောင်မြင်အောင် တက်ရောက်ခဲ့ကြသော သင်တန်းသူများအား ကျေးဇူးတင်ရှိပါကြောင်း၊ ကိုယ်တိုင်အင်္ကျီများ ချုပ်လုပ်သွားနိုင်ပြီး ဝတ်ဆင်ထားသည်များအား မြင်တွေ့ရသည့်အတွက် များစွာဂုဏ်ယူပါကြောင်း၊ သက်ဆိုင်ရာ Group များမှ တစ်ဆင့် အချိန်မရွေး ဆက်သွယ်ခြင်း၊ မေးမြန်းခြင်းများ အပြန်အလှန် တိုင်ပင်ခြင်းများ ဆောင်ရွက်နိုင်ပါကြောင်း နှင့် New Myanmar Foundation ဘက်မှလည်း တတ်နိုင်သ၍ ကူညီပေးသွားမည်ဖြစ်ကြောင်း သင်တန်းပြီးဆုံးသွားသော်လည်း သင်တန်းသူများအချင်းချင်း ညီအစ်ကိုမောင်နှမ အရင်းသဖွယ် ရှေ့ဆက်ခင်မင် သွားကြပြီး တစ်ဦးနှင့် တစ်ဦး ကူညီရိုင်းပင်းကြရန်နှင့် အလုပ်ရှာဖွေရန်တို့ကို ပြောကြားခဲ့ပါသည်။
ထို့နောက် သင်တန်းဆရာမ (၂) ဦးမှလည်း ယခု စက်ချုပ်သင်တန်းကဲ့သို့သော မဲဆောက်ရောက် မြန်မာပြည်သူများအတွက် အလုပ်အကိုင်အခွင့်အလမ်းရရှိစေမည့် အသက်မွေးဝမ်းကျောင်းသင်တန်းကို ဖွင့်လှစ်ပေးသော ဒေါက်တာစန်းအောင်နှင့်တကွ နယူးမြန်မာဖောင်ဒေးရှင်းအဖွဲ့သားများကို အထူးပင် ကျေးဇူးတင်ပါကြောင်း၊ သင်တန်းကာလတစ်လျှောက် ဆရာမများ၏ သင်ကြားပြသပေးမှုများကို လေးစားလိုက်နာမှုဖြင့် အခက်အခဲများကြားမှ လုံ့လဝိရီယစိုက်ထုတ်ကာ သင်ယူခဲ့ကြသော သင်တန်းသူများကိုလည်း လေးစားဂုဏ်ယူပါကြောင်း၊ သင်တန်းသားများအနေဖြင့် စက်ချုပ်ပညာရပ်နှင့်ပတ်သတ်၍ လိုအပ်လာပါကလည်း ဆရာမများထံ အကူအညီ တောင်းခံနိုင်ပါကြောင်း၊ မဲဆောက်ရောက် မြန်မာပြည်သူများအတွက်လည်း မိမိတို့ တတ်မြောက်ထားသည့် ပညာရပ်များဖြင့် အကျိုးပြုကြစေလိုကြောင်း နှင့် နောင်တစ်ချိန်တွင် သင်တန်းသားများကိုယ်တိုင် စက်ချုပ်သင်တန်းများ ပြန်လည်ပို့ချနိုင်သည်အထိ ဆက်လက်ကြိုးပမ်း အားထုတ်သွားစေလိုကြောင်း ပြောကြားခဲ့ပါသည်။
ဆရာမများ၏ ပြောကြားမှုများအပြီးတွင် သင်တန်းသူ/ သင်တန်းသား တစ်ဦးချင်းစီမှ သင်တန်း၏ အားသာချက်/အားနည်းချက်များနှင့် ကြုံတွေ့ရသော အခက်အခဲများ၊ ကျေနပ်ပီတိစကားများကို မျှဝေခဲ့ကြပါသည်။ အဆိုပါ တင်ပြဆွေးနွေးမှုများအပြီးတွင် သင်တန်းသူ (၁၆) ဦးမှ ဖန်တီးချုပ်လုပ်ခဲ့သော အင်္ကျီလက်ရာများကို မဲပေးသည့်စနစ်ဖြင့် ရွေးချယ်စေခဲ့ပြီး ချုပ်လုပ်မှုအရည်အသွေးအကောင်းဆုံး သင်တန်းသား (၅) ဦးကို ဂုဏ်ပြုဆုများ ချီးမြှင့်ခဲ့ပါသည်။ ထို့နောက် သင်တန်းသူ၊ သင်တန်းသားများအား သင်တန်းဆင်းလက်မှတ်များ ပေးအပ်ခဲ့ပြီး အမှတ်တရဓါတ်ပုံများ ရိုက်ကူးကာ သင်တန်းဆင်းပွဲကို အောင်မြင်စွာပိတ်သိမ်းခဲ့ပါသည်။
အခမဲ့ အခြေခံလျှပ်စစ် မော်တာစက်ချုပ်သင်တန်း အပတ်စဉ်-(၂) သင်တန်းတွင် စက်ချုပ်ပညာသာမက
ထိုင်းနိုင်ငံ၏ ရွှေ့ပြောင်းလုပ်သားများအတွက် အလုပ်သမားကာကွယ်စောင့်ရှောက်ရေး ဥပဒေ သင်တန်း၊ အလုပ်ရှင်နှင့် အလုပ်သမားများကြား ဖြစ်တတ်သော ပြဿနာများနှင့် ဖြေရှင်းရန် နည်းလမ်း
များ၊ စက်ရုံအလုပ်ရုံများတွင် အလုပ်လုပ်ကိုင်စဉ်အတွင်း မတရားသဖြင့်ခိုင်းစေခံရခြင်း၊ ညှဉ်းပမ်းနှိပ်စက်ခြင်း၊ ခေါင်းပုံဖြတ်ခံရခြင်း၊ လုပ်ခ လစာများအပြည့်အဝမရရှိခြင်း အစရှိသည်တို့အား ဖြစ်ပွားခဲ့ပါက တိုင်ကြားဆက်သွယ်နိုင်မည့် နည်းလမ်းများကိုလည်း မျှဝေခဲ့ပါသည်။
#sewingmachine #NewMyanmarFoundation
