Apr 25, 2024
New Myanmar Foundation မှ ဦးစီးကျင်းပပြုလုပ်သော (၁) လကြာ နေ/စား စရိတ်ငြိမ်း “အခမဲ့ အခြေခံ မော်တာစက်ချုပ်သင်တန်း” အပတ်စဉ်-(၁) ကို ၂၀၂၄ ခုနှစ်၊ ဧပြီလ (၂၅) ရက်နေ့တွင် ကျင်းပပြုလုပ်ခဲ့ပါသည်။
ဦးစွာပထမ New Myanmar Foundation ၏ Executive Director ဒေါက်တာစန်းအောင်မှ အခြေခံ မော်တာစက်ချုပ်သင်တန်းများကို ၂၀၂၂ ခုနှစ် နှစ်ဆန်းပိုင်းမှစ၍ (၁၀)ရက်ကြာ သင်တန်းများစတင် ဖွင့်လှစ်ခဲ့ပြီး အခက်အခဲများစွာရှိခဲ့ကြောင်း၊ ယခုသင်တန်းအား Australian Aid မှ ထောက်ပံ့ပေး ထားခြင်းဖြစ်ပြီး သင်တန်းဖွင့်လှစ်ရခြင်း၏ အဓိကရည်ရွယ်ချက်မှာ အမျိုးသမီးများ၏ စွမ်းဆောင် ရည်မြင့်မားရန် နှင့် အထည်ချုပ်စက်ရုံများတွင် အလုပ်အကိုင် အလွယ်တကူ ရရှိရန် ရည်ရွယ်ဖွင့်လှစ် ခြင်းဖြစ်ကြောင်း၊ သင်တန်းကာလ (၁) လ အတွင်း စည်းကမ်းများကို လေးစားလိုက်နာရန်၊ သင်တန်းကာလအတွင်း မိသားစုဝင်များကဲ့သို့ ပေါင်းသင်းဆက်ဆံကြရန်နှင့် သင်တန်းအားလုံး ပြီးဆုံးသည်အထိ တက်ရောက်ပေးကြရန် တိုက်တွန်းပြောကြားသွားပါသည်။
ဆက်လက်၍ သင်တန်း တာဝန်ခံ မသိင်္ဂီ မှ အခမဲ့ အခြေခံမော်တာစက်ချုပ်သင်တန်းသို့ ရောက်ရှိလာ ကြသော သင်တန်းသူ / သား များအား ဝမ်းသာကြိုဆိုကြောင်း ၊ New Myanmar Foundation ၏ ကူညီဆောင်ရွက်နေမှုများနှင့် ရယူနိုင်သောအခွင့်အလမ်းများကို Program အလိုက်ရှင်းပြပေးခဲ့ပြီး မိမိလိုအပ်သည့်အချိန်တွင် ဆက်သွယ်အကူအညီတောင်းနိုင်ပါကြောင်း၊ အချင်းချင်း ဗဟုသုတမျှဝေ နိုင်ရန်နှင့် အလုပ်အကိုင်အခွင့်အလမ်းများ၊ အခြားသောအထောက်အပံ့များ ရယူနိုင်ခွင့်များအတွက် Signal Groupများ ဖွဲ့ပေးထားခြင်းဖြစ်ကြောင်း၊ လိုအပ်မှုများနှင့် အကြံပြုလိုသည်များရှိပါက ဆက်သွယ်နိုင်ပါကြောင်း၊ သင်တန်းသား/သူ အချင်းချင်း သင်တန်းကာလတွင် မောင်နှမစိတ်ဓာတ် ဖြင့် ရိုင်းပင်းစောင့်ရှောက်စေလိုကြောင်း၊ သင်တန်းအား ပြီးဆုံးသည်အထိ တက်ရောက်ပြီး သင်တန်း မှ ချမှတ်ထားသော စည်းကမ်းများအား လိုက်နာပေးပါရန် ပြောကြားခဲ့ပါသည်။
ထို့နောက် သင်တန်းဆရာမ (၂)ဦးမှ အသီးသီး မိတ်ဆက်ခဲ့ကြပြီး ယခုကဲ့သို့ သင်တန်းနည်းပြ ဆရာမ များအဖြစ် တစ်ဖက်တစ်လမ်းမှ ပါဝင်ကူညီခွင့်ရခြင်းနှင့် ဆုံတွေ့ခွင့်ရသည့်အတွက် ဝမ်းသာကြောင်း၊ သင်တန်းတစ်ခုဖြစ်မြောက်ရန်အတွက် များစွာအခက်အခဲ ရှိသောကြောင့် သင်တန်းသား/သူ များ အနေဖြင့် အာရုံစိုက်ပြီး လေ့လာသင်ယူစေလိုကြောင်း နှင့် သင်တန်း တက်ရောက်နေစဉ်အတွင်း စည်းကမ်းလိုက်နာရန်၊ အချင်းချင်းကူညီရိုင်းပင်းကြရန်တိုက်တွန်းပြောကြားပေးခဲ့ပါသည်။
ထို့နောက် သင်တန်းသားများမှ တစ်ဦးချင်းမိတ်ဆက်စကားများ ပြောကြား၍ အခမ်းအနားအား အောင်မြင်စွာ ရုတ်သိမ်းခဲ့ပါသည်။
New Myanmar Foundation အနေဖြင့် ယခုဖွင့်လှစ်သည့် (၁) လကြာ နေ/စား စရိတ်ငြိမ်း “အခမဲ့ အခြေခံ မော်တာစက်ချုပ်သင်တန်း” အပတ်စဉ်-(၁) တွင် စက်ချုပ်ပညာရပ်သာမက ထိုင်းနိုင်ငံ၏ ရွှေ့ပြောင်းလုပ်သားများအတွက် အလုပ်သမားကာကွယ်စောင့်ရှောက်ရေး ဥပဒေသင်တန်း ကိုလည်း ဝေမျှပေးသွားမည် ဖြစ်ပါသည်။
#NewMyanmarFoundation#sewingmachine
Apr 24, 2024
၂၀၂၄ ခုနှစ်၊ ဧပြီလ၊ ၂၃ရက်နေ့တွင် NEW MYANMAR FOUNDATION မှ မြ၀တီမြို့တိုက်ပွဲများကြောင့် နယ်စပ်ဖြတ်ကျော် ထွက်ပြေးလာကြရသော စစ်ဘေးရှောင်များအား လိုအပ်သော အကူအညီများပေးနိုင်ရန် စစ်ရှောင်စခန်းများသို့ သွားရောက်ခဲ့ရာ ဂိတ်(၃၅) သို့ တိုက်ရိုက်၀င်ရောက်တွေ့ဆုံခွင့်ရခဲ့ပါသည်။ မျက်မြင် မှတ်တမ်းရယူခဲ့သော အချက်များအရ
၂၃.၄.၂၀၂၄ နေ့တွင် စခန်းတွင်းလက်ကျန်လူဦးရေမှာ အမျိုးသမီး (၄၄၃) ဦး၊ အမျိုးသား (၆၁၈) ဦး၊ ကလေးသူငယ် (၃၃၄)ဦး၊ စုစုပေါင်း (၁၃၉၅) ဦး ရှိပြီး
အခြေခံလိုအပ်ချက်များမှာ-
၁။ ရေချိုးဆပ်ပြာ
၂။ အဝတ်လျှော်ဆပ်ပြာမှုန့်
၃။ သွားတိုက်ဆေး
၄။ ခေါင်းလျှော်ရည်
၅။ ကလေးအဝတ်အထည် (ကျား/မ)
၆။ အမျိုးသမီးဝတ်လုံချည်
၇။ ရေခဲ (နေ့စဉ် ကီလို၁၂၀)
၈။ တိုင်းရင်းဆေး (အစာကြေဆေး၊ သွေးဆေး)
၉။ အစာပြေ လက်ဘက်ရည်ကော်ဖီ တို့ဖြစ်ကြောင်း တွေ့ရှိခဲ့ရပါသည်။
Apr 22, 2024
၂၁.၄.၂၀၂၄ ရက်နေ့တွင် New Myanmar Foundation မှ မြဝတီတိုက်ပွဲအခြေအနေကြောင့် ထွက်ပြေးတိမ်းရှောင်လာသော စစ်ဘေးရှောင်ပြည်သူ ၃၀၀ ကျော်အား သီးစုံချဉ်ဟင်း၊ ငါးခြောက်ကြော် နှင့် ထမင်းတို့အား နေ့လည်စာအဖြစ် သွားရောက်လှူဒါန်းမှုပြုခဲ့ပါသည်၊၊
#NewMyanmarFoundation
#စစ်ဘေးရှောင်ပြည်သူများ
Apr 19, 2024
New Myanmar Foundation သည် ၂၀၂၁ ခုနှစ် ဧပြီလမှစတင်၍ ဒီမိုကရေစီအရေး ကြိုးပမ်းသူများ အပါအဝင် မဲဆောက်သို့ ထွက်ပြေးရောက်ရှိလာသော မြန်မာပြည်သူများအတွက် ခိုလှုံရန်နေရာထိုင်ခင်းများကို ကူညီရှာဖွေ ဆောင်ရွက်လျက်ရှိပါသည်။
NMF၏ အိမ်ယာများတွင် အမျိုးသမီးသီးသန့်၊ အမျိုးသားသီးသန့်နှင့် မိသားစုအတွက်ဟု ခွဲခြားထားသောကြောင့် မဲဆောက်သို့ အဖော်မပါတစ်ဦးတည်း ရောက်လာသူများအနေဖြင့် အဆင်ပြေလုံခြုံစွာ နေနိုင်မည်ဖြစ်ပါသည်။ အမျိုးသမီးဆောင်နှင့် အမျိုးသားဆောင်တို့တွင် တစ်ခန်း၌ (၄) ဦးစီ အတူနေထိုင်ရမည် ဖြစ်ပါသည်။ မိသားစုများ အနေနှင့်မူ သီးသန့်အခန်းများရရှိမည်ဖြစ်ပါသည်။
Safe House တွင်နေထိုင်စဉ် ကာလအတွင်း မီးဖိုချောင်သုံးပစ္စည်းများ၊ စောင်၊ ခြင်ထောင်၊ခေါင်းအုံးများ၊ အိမ်တွင်း ပရိဘောဂများပံ့ပိုးပေးထား ပါသည်။ Wifi internet များလည်း တပ်ဆင် ပေးထားပြီး သွားလာရေး အတွက် စက်ဘီး များ၊ ဆိုင်ကယ်နှင့်ကားကိုလိုအပ်သလို အသုံးပြုခွင့်ပေးထားပါသည်။ ထို့အပြင် Safe house တွင်နေထိုင်သော မိသားစုများ အတွက် အခြေခံကျန်းမာရေး စောင့်ရှောက်မှုကို တာဝန်ယူ ဆောင်ရွက်ပေးပါသည်။ အသိပညာတိုးပွား စေရန်ရည်ရွယ်သော စာကြည့်တိုက်တစ်ခုကို လွန်ခဲ့သောအောက်တိုဘာလအတွင်း စတင်တည်ထောင်ထားပြီးဖြစ် ပါသည်။ စားနပ်ရိက္ခာအတွက် NMFမှ ပုံမှန်အခြေခံ စားနပ်ရိက္ခာ အစီအစဉ်ကိုလည်း လျှောက်ထားနိုင်ပါသည်။ Safe House ကူညီပေးနိုင်သော ကာလမှာ ၃လဖြစ်ပါသည်။
Safe House ၌ နေစဉ် ကာလအတွင်း NMFမှ အောက်ဖော်ပြပါ ဝန်ဆောင်မှုများအားလည်း စီစဉ်ဆောင်ရွက်ပေး လျက်ရှိပါသည်။
• အင်္ဂလိပ်စာသင်တန်း၊ ထိုင်းစာသင်တန်း၊ Digital Security သင်တန်း နှင့် လူ့အခ္ငင့်အရေးသင်တန်း၊ စိတ်ခွန်အားမြှင့်တင်ရေးသင်တန်းများ ကို အခမဲ့တက်ရောက်နိင်ပါသည်။
• အလုပ်အကိုင်အခွင့်အလမ်းများကိုလည်း ကူညီရှာဖွေပေးလျှက် ရှိပါသည်။
• အရေးပေါ်ဆေးကုသမှု / ပုံမှန်ဆေးကုသမှုလုပ်ငန်းများကိုလည်း တာဝန်ယူဆောင်ရွက်ပေးလျက်ရှိသည်။
• ကျောင်းနေအရွယ် ကလေးများအား ကျောင်းအပ်နှံပေးခြင်း/သင့်တော်သော ကျောင်းများရှာပေးခြင်းများကို လည်း ကူညီလုပ်ဆောင်ပေးလျှက် ရှိပါသည်။
Safe Houseတွင်နေထိုင်သူ တစ်ဉီးချင်း၏လိုအပ်ချက်များကို အသေးစိတ်စုံစမ်းမေးမြန်းပြီး အတတ်နိုင်ဆုံးဖြည့် ဆည်းပေးမည်ဖြစ်ပါသည်။ NMF၏ Safe Houseတွင် နေထိုင်ခွင့်အတွက်လျှောက်ထားသူများသည် ဒီမိုကရေစီ အရေး၊လူ့အခွင့်အရေး တက်ကြွလှုပ်ရှားသူများအား ဦးစားပေးမည်ဖြစ်ပြီး ပြည်တွင်းမှ စစ်မှုထမ်းရှောင်လာကြသူ များ၊ စစ်ရှောင်ပုဂ္ဂိုလ်များအပါအဝင် မြန်မာပြည်သူပြည်သားများ အတွက်လည်း ထည့်သွင်းစဉ်းစားပေးမည်ဖြစ်ပါ သည်။
လျှောက်ထားသူများသည် အကျင့်စာရိတ္တကောင်းမွန်ပြီး လူအများနှင့် သင့်တင့်မျှတာစွာ နေနိုင်သူ ဖြစ်ရပါမည်။ အထက်ပါ အချက်နှင့် ကိုက်ညီပြီး ထောက်ခံပေးမည့် ပုဂ္ဂိုလ် (၂) ဦးရှိပါက NMF၏ Safe House လျှောက်ထားခြင်း ဆိုင်ရာဖုန်း၏ Signal နံပါတ် (၀၉၄၇၈၄၁၉၆၇) သို့ တနင်္လာမှ သောကြာနေ့များတွင် မနက် (၉) နာရီမှ ညနေ (၅) နာရီခွဲအတွင်း ဆက်သွယ်စုံစမ်း လျှောက်ထားနိုင်ပါသည်။
#NewMyanmarFoundation
#safehouse
