အခမဲ့ အခြေခံမော်တာ စက်ချူပ်သင်တန်းအတွက် အလှူခံခြင်း
နယူးမြန်မာဖောင်ဒေးရှင်းသည် မဲဆောက်ရောက်မြန်မာ့ ဒီမိုကရေစီနှင့်လူ့အခွင့်အရေးလှုပ်ရှား ဆောင်ရွက်သူများ အလုပ်အကိုင်အခွင့်အလမ်းများ ရရှိနိုင်စေရန် ရည်ရွယ်လျက် အသက်မွေးဝမ်းကြောင်း သင်တန်းများ ပို့ချသင်ကြားပေးလျက်ရှိပါသည်။ ထိုသင်တန်းများထဲမှ အခမဲ့ အခြေခံမော်တာ စက်ချူပ်သင်တန်းသည်လည်း တစ်ခုအပါအဝင်ဖြစ်ပါသည်။ အမျိုးသား/သမီး အခမဲ့ အခြေခံမော်တာ စက်ချူပ်သင်တန်းများကိုဖေဖော်ဝါရီလ၊ (၁)ရက်၊ ၂၀၂၂ခုနှစ် မှ စတင်ကာ ဖွင့်လှစ်ပေးခဲ့ပါသည်။
သင်တန်းအပတ်စဉ် (၁) မှ (၁၉) အထိ သင်တန်းအပတ်စဉ်တစ်ခုလျှင် (၅)ရက်ကြာသင်တန်းပေးခဲ့ပြီး ၊ အပတ်စဉ် (၂၀)မှ (၂၆)ထိ သင်တန်းအပတ်စဉ်တစ်ခုလျှင် (၁၀)ရက်ကြာတိုးမြင့်ဖွင့်လှစ်သင်ကြားပေးခဲ့ပါသည်။ သင်တန်းအပတ်စဉ် (၁)မှ (၂၆)ထိ သင်တန်းတက်ရောက်သူ စုစုပေါင်း (၂၅၅)ဦး၊ သင်တန်းသား (၁၀၇)ဦး၊ သင်တန်းသူ (၁၄၈)ဦး တက်ရောက်ခဲ့ပြီး ထိုအထဲမှ သင်တန်းသား (၉၄)ဦး၊ သင်တန်းသူ (၁၁၂)ဦး ကို အလုပ်အကိုင်ချိတ်ဆက် ရှာဖွေပေးနိုင်ခဲ့ပါသည်။
ထို့ကြောင့် ဤသင်တန်းသည် မဲဆောက်ရှိ မြန်မာဒီမိုကရေစီအရေး တက်ကြွလှုပ်ရှားသူများ အလုပ်အကိုင်အခွင့်အလမ်း ရရှိရေးအတွက် အမှန်တကယ် အကျိုးရှိသော အစီအစဉ်ဖြစ်ပါသည်။ သို့သော် ယခုအခါ အခမဲ့ အခြေခံမော်တာ စက်ချူပ်သင်တန်းကို ဆက်လက်ဖွင့်သင်ကြားနိုင်ရန်အတွက် ရံပုံငွေ အခက်အခဲများ ရှိနေပါသည်။ ဤသင်တန်းများ ဖြစ်မြောက်ရေး အတွက် “Australian Aid” မှ အထောက်အပံ့အချို့ကိုသာ လက်ခံရရှိပါသည်။
သို့ပါသောကြောင့် နိုင်ငံတကာနှင့်မဲဆောက်ရောက်မြန်မာပြည်သူ/သား တစ်ဦးချင်းမှ မိမိတို့တတ်စွမ်းသလောက် ပါဝင်ကူညီ ထောက်ပံ့ပေးကြပါရန် နယူးမြန်မာဖောင်ဒေးရှင်းမှ လေးစားစွာ မေတ္တာရပ်ခံလိုပါသည်။ ဤသင်တန်းကို ဆက်လက်ဖွင့်လှစ်ပေးနိုင်ပါက မဲဆောက်ရောက် မြန်မာပြည်သူ/သားများ လိုအပ်နေသော အလုပ်အကိုင်အခွင့်အလမ်းများကို ဖော်ဆောင် ပေးနိုင်မည်ဖြစ်သည့်အပြင် သင်တန်းသူ/သားများ၏ ဘဝရပ်တည်ရေးအတွက်လည်း အတတ်ပညာတစ်ခုကို ပေးစွမ်းနိုင်ခြင်း စသည့်အကျိုးကျေးဇူးများကို ရရှိမည်ဖြစ်ပါသည်။
